An délégasion espésialis kokodil sòti jik an Frans pou éséyé kolé Joj. Nou té ja di pa ni lontan, Joj pa té tou sel pas asiparé komkidiré yo té ké wè pliziè kokodil (Joj, jòjet, jòjina é i té menm ni an piti jordi).
Poulemoman ni moun ka mandé poutji yo ka anmerdé Joj. Poutji yo pa ka alé chaché Poudin pou mennen’y « La Cour Pénale Internationale » kon yo té fè pou an présidan afritjen ?
Ni dot ka mandé sa ki lé yo kité Joj trantjil, kolé’y ek ladjé’y an jaden sé moun-tala.
An sel polémik ka alé toupandan ladjè ka pété fwa moun pabò Likrèn. Sé Ris-la pa ka tann mach, yo jik ladjé an bonm anlè an lizin nikléyé. Chonjé sa ki té fet Tchernobil an menm péyi-tala.
Es sa pé ké fè an retour de flam anlè nou ?
Es sa pé ké rivé jik isi-a kon sab Sahara-a ?
An menm balan-an Mano Makawon ni lentansion vréyé an ti-let ba moun. Ni anlo ki ja di yo pé ké menm wouvé’y, mé sèvi’y kom papié swiyé oben si zot lé papié ijiénik.
Ni an konpè Adjilbè ki pa enmen fè lafet pies, i di konsa :
- Poutji nou pa ka éli Joj mwa prochen ?
Misié pa ni labitid anmerdé pèsonn, asiré zafè kouvèdifé ek mas-la té ké dit.
Mé yo réponn-li, prèmié minis-la fini di mas ké dit pou le 15 mas. Misié di kanmenm :
- Sa drol, pas ka fet, jis lè pou moun alé voté !
Es sé an fig ?
Anlo moun ka di, yo pé ké kouyonnen yo, pas ni trop moun ka pran fè épi ladjè-a pabò Likrèn.
Jid
Bel poveb kréyol :
« Jako pa konnet goumen, plim-li alé ladjè »