J. S. Sahaï est un ami d’Antilla qui vit et travaille en Guadeloupe. Indo-descendant, comme on dit, ll publie de temps en temps de superbes textes en Kreyol, renforçant ainsi notre volonté irrémédiable de donner sa place, dans les écrits, à notre langue… Aujourd’hui, il salue un suédois Mysié Malta Olsson…
28 novanm, sé fèt à Misyé Malté Olsson, on Syédwa ki mayé dèpi 19 an èvè Maxette Beaugendre, on Gran Modèl Fanm Kréyol Gwadloup ! Mi on gloriyé Jean S. Sahai maké pou Malté (an Kréyol Gwadloup). Misyé Malté ! Bon fèt pou’w, an kyou a moun. An kyou a moun ki pa entélijan, é ki ka kwè tout blan sé blan. Misyé Malté ou ka onoré mwen é péyi an mwen ! Misyé malté ou gloriyé péyi an mwen, ou mété kilti a’y o zolenpyad, é ou ranjé kò a’w pou Maxette divini on anbasadris a sa nou yé, o pli ho nivo ankò. Misyé Malté, fo pa pon moun malpalé’w ni ba’w gaz, an péké pran sa ! Misyé Malté, malgré frédi a péyi a’w é moun blon a’y, ou rivé a fè yo aprésié Maxette, enmé Maxette, jalou Maxette é jis anvi kopyé Maxette, ou ka rann vou kont ? Misyé Malté ou sé on marabou ! Ou fè solèy kléré tout lanné tou patou Maxette pasé, ou fè Maxette vwè péyi apré péyi é fè’y konprann valè a kréyolité a’y plis ki an pwop péyi a’y. Mi sa pou nonm aprann fè pou fanm. Misyé Malté, vou é Maxette zot mérité viv lontan, lontan, lontan, paskè chak jou zot ka mété bòm é pasé lansan si bobo a limanité. La vi sé on fèt, gras a zot, é toupatou zot pasé. I sifi an sonjé zot mwen kontan ! Misyé Malté, an ka ba’w kolyé flè a’w jòdi-la, fwi, konfiti, sinobol, grabio, épi bon zanmann é prino, pri No… bel a Lanmou Parfè. Bon fèt pou’w, Misyé Malté, an kyou a moun ! Jean S. Sahaï
