Tammy tamizé limiè anlo kay. Ni an lanm woz té pou monté la Montàn Pèlé, yo té oblijé annilé’y.
Mé pli red-la kanmenm anlo moun pran dapiyan asou Tammy pou pa té désann Lasavann. Anlo organizatè té sanblé pou préparé Gaoulé kont Klowdékòn ki pou fet le 28 oktob, menm jou « Jounen Entènasional Kréyol ».
Es ké ni moun sanmdi ?
Es swadizan yo ké pé di yo pa kay lariviè, yo pa té okouran,?
Antouléka fok nou mobilizé an mas pou lajistis sispann lenjistis « Non-lieu-a ». Sa pa normal tousa moun malad épi kansè, dot machann ich-yo ka koulé épi plen poblem santé ek Gouvelman ka di : sikilé pa ni ayen a wè !
Si pa ni mobilizasion pé ké ni solision. Tammy mantjé nou, mé pa koté Mari-Galant ek sirtou Ladézirad yo pran bon fè. Minis péyi andéwò Lafrans jik vini siwplas pou wè déga. Asiparé yo pou désidé an lwa « Katastrof natirel » pou sé moun an trapé an ti-kéchoy.
Kom ni moun éti pa malpalan pies, man jik tann yonn di :
- Misié vini pou montré Lafrans toujou la lè ni malè. Sé pou nou chonjé’y lè ké ni éleksion !
Man pa sav si i ni rézon, mé sel bagay man asiré, nou an tan siklòn jikatan novanm fini.
Kidonk manmay pengad !
Jid
Bel poveb kréyol :
« Ladévenn pa konnet pokosion »